Ի՞նչպես հավաքել 1000 կտորանոց փազլ

Շատերի համար փազլ հավաքելը թվում է մեծ գլխացավանք։ Դա հիմնականում նրանից է, որ կամ երբեք չեն փորձել ինքնուրույն հավաքել, կամ փորձել են մեկ անգամ ու վատ ռազմավարությամբ։ Եթե հետևեք այս պարզ կանոններին, այն կդառնա ոչ թե գլխացավանք,, այլ անչափ հաճելի ու հանգստացնող գործընթաց։

1. ԸՆՏՐԵՔ ՀԱՐՄԱՐ ՏԱՐԱԾՔ

1000 կտորանոց փազլը սովորաբար ունի մոտ 50×70 սմ չափ։ Հավաքման համար ընտրեք այնպիսի սեղան, որը դրանից ավելի մեծ է և հնարավորինս քիչ է օգտագործվում, քանի որ փազլը սովորաբար չի հավաքվում մեկ նստելով և կարող է պահանջել մի քանի ժամ կամ նույնիսկ մի քանի օր։

Լավ տարբերակ են՝

ճաշի սեղանը
հատուկ փազլների հավաքման սեղանը

Կարելի է օգտագործել նաև փաթաթվող գորգ, որի վրա կարող եք հավաքել փազլը և անհրաժեշտության դեպքում հեշտությամբ փաթաթել ու տեղափոխել։ Յատուկում մենք ունենք այդ գորգերից, բայց դրանք ներառված չեն հիմնական ապրանքացանկում։ Եթե ցանկանում եք ունենալ՝ գրեք մեր ֆեյսբուքին կամ ինստագրամին։

2. ՀՈԳ ՏԱՐԵՔ ԼԱՎ ԼՈՒՍԱՎՈՐՈՒԹՅԱՆ ՄԱՍԻՆ

Լուսավորությունը կարևոր է, որպեսզի աչքերը չհոգնեն և մանր գույները հեշտ տարբերակվեն։ Լույսը պետք է հավասարաչափ ընկնի փազլի ամբողջ մակերեսի վրա։

Միայն առաստաղի կամ բնական լույսը միշտ չէ, որ բավարար է և կարող է ստվերներ առաջացնել։ Լավ տարբերակ է սեղանի լամպը, որը ապահովում է ուղղված և հավասար լուսավորություն։

Եթե նման լույս չունեք, փորձեք սեղանը տեղադրել սենյակում այնպես, որ հնարավորինս լավ լուսավորվի։

3. ՏԵՍԱԿԱՎՈՐԵՔ ԵՎ ԽՄԲԱՎՈՐԵՔ ԿՏՈՐՆԵՐԸ

Սկզբում շրջեք բոլոր կտորները այնպես, որ նկարի կողմը վերև լինի։

Դրանից հետո կարող եք կտորները տեսակավորել՝

ըստ գույների
ըստ նկարի ակնհայտ հատվածների
ըստ ձևերի

Օգտակար է ունենալ մի քանի փոքր աման կամ տուփ՝ կտորները խմբավորելու համար։

4. ՍԿՍԵՔ ԵԶՐԵՐԻՑ

Փազլ հավաքելու ամենահարմար եղանակներից մեկը եզրերից սկսելն է։

Տեսակավորման ընթացքում գտեք և առանձնացրեք բոլոր այն կտորները, որոնք ունեն ուղիղ կողմ։ Դրանք կազմում են փազլի շրջանակը և արագ կօգնեն ստեղծել ամբողջական սահմանը։

Շրջանակը հավաքելուց հետո արդեն շատ ավելի հեշտ է պատկերացնել ամբողջ փազլի կառուցվածքը։